Ինձ շատ են հարցնում` ինչու <<անվերնագիր>>: Միթե հնարավոր չէր ինչ-որ բան մտածել, դու մարդկանց մասին ես գրում, գրեիր <<Մարդկանց մասին>>: Այսօր ուզում եմ պատասխանել:
Վերնագիրն ինձ համար մի տեսակ կաղապար է: Երբեք չի ստացվել վերնագրով շարադրություն գրել ու վերնագրից չշեղվել: Հատուկ ինձ համար լեզվի դասերին բացառություն էր արվում. ուսուցիչը միշտ ասում էր` գրիր որևէ բանի մասին, գրիր այնքան, քանի դեո ասելիք ունես, թող կես էջ լինի, ջրիկ չլինի: Ու ես գրում էի... Էջերով, խիտ , անվերնագիր... Ժամանակի ընթացքում ավելի ու ավելի շատ բան էի հասկանում ու սկսում էի ավելի ու ավելի կծու գրել, այնքան կծու, որ ոչ մի վերնագիր էլ չէր արտացոլում: Ուրեմն` թող լինի անվերնագիր, ինչ կա որ...
Վերնագրերը մի տեսակ հանգերի նման են. եթե հմուտ բանաստեղծ ես, գոհարներ ես կերտում, եթե ոչ` հանգերը կաղապարում են ու գրվածքդ ջրիկ է ստացվում. ես երբեք բանաստեղծական հատկություններով չեմ փայլել: Ինչ որ ճիշտն է, ճիշտն է...
Սիրային պատմությունների լավագույն վերնագիրը <<Սեր>>-ն է, բայց դրանում կա նաև թախիծ, ատելություն, երազանք, կարոտ, ամոթ, ցավ, գաղտնիք: Այդքանը վերնագրում գրել կլինի՞: Կամ գրում ես մարդկային հարաբերությունների մասին. քանի՞ տեսակ հարաբերություններ կան. հազարից շատ... Օրինակները շատ են, չեմ էլ փորձի թվել:
Վերնագիրն ինձ համար փոքրիկ բառ է ստեղծագործությունների համակարգման և դիմացը էջ գրելու համար, իսկ ես, ժողովուրդ ջան, գիրք գրելու հնարավորություն ու նյութ չունեմ առայժմ, այնպես որ անվերնագիր յոլա կգնամ:
Սրտանց ձեր անվերնագիր Մարիա Հովհաննիսյան